عائلة حركة بلاد الشام الموسيقية نحنا فخورين انه نكون من منتجين «قلب الشارع» الألبوم المصغر للفنان السوري «هوس» الألبوم متوفر على اليوتيوب من تاريخ ١٣/٧/٢٠٢٢
Please click here to read the interview in English.
أساسي: ليش سميت الألبوم «قلب الشارع»؟
هوس: الشارع بيحتوي فئات مختلفة من الناس، من ضمنهم الناس البسيطة اللي ما صار لهم فرصة يتعلمو بالمدارس، فـ تعلموا من الشارع.
بدي الألبوم يصرخ «آني من الرقة» لفرجي فخري بمدينتي
The HWS
أساسي: لمين موجه الألبوم؟
هوس: لي أنا أول شي. ثاني شي، للناس اللي ينتمون لكلامي اللي عم احكيه. لسوريا، وتحديدا مدينتي الرقة. وللبيئة اللي أنا كبرت و وعيت عالدنيا فيها و طلعت منها، بس لهلق حامل معي كل الذكريات و القصص والأفكار جمعتهم مع بعض وحطيتهم بالألبوم.
أساسي: شو الرسالة اللي بدك توصلها للمستمعين من خلال الألبوم؟
هوس: للشباب و لجيلي، خصوصا ولاد الشارع – بدي اسأل : شو ممكن ننجز اذا كنا جايين من الشارع؟ بعد الحروب و التراما ، بدون أي تعليم أو طفولة بريئة. حتى كل شي حوالينا مدمر.و خاصتا اللي تغربو وحاسين بالضياع بشوارع جديدة وغير مألوفة عليهم. بعتقد في كتير ناس بتشاركني التجارب اللي عم قدمها بالموسيقى.
أنا من الرقة. شارع الرقة، تحديدا هاد شارعي. بدي الألبوم يصرخ «أنا من الرقة» لورجي فخري بمدينتي. الموسيقى اجت من شب عمره ٢٠ سنة من الرقة. بدي الألبوم يصر ميراثنا.
أساسي: احكيلي عن غلاف الألبوم.
هوس: كتير ناس سألتني عن السلاح اللي بصورة غلاف الألبوم. هاد الشي ما بمثل حياتي اليوم – أنا ما بستعمل سلاح. الأسلحة بس لتفرجي اللي نحنا شهدناه بطفولتنا بشوارع الرقة. هاد كل شي شفناه ونحنا عم نكبر.
أساسي: احكيلي عن أغاني «قلب الشارع»
هوس: أول أغنية اسمها «شايل دمي». بتحكي عن كل نقطة دم أنا خسرتها من خلال العنف و التراما من جوى وبرى بلدي. مريت بمشاكل. انصبت بالرصاص بالحرب. حكيت عن كل هالشغلات بطريقتي أنا. كنت اجتمع مع ناس كتير بس لاسمع و اتعلم. مرة من المرات شايب قلي حكمة «مملكة الزلم بيتهم» و انا استعملت هالمقولة وخاطبت فيها أمي و قلت» برى البيت اش ما سويت تظل مملكة الزلم يما بيتهم»
الأغنية الثانية «بينز» بتحكي عن تجربتي بعلاقة سابقة. كيف فتت بالعلاقة و كيف مريت فيها و كيف طلعت منها. كنت مليان غضب و عاطفة بنفس الوقت. يعني كيف شخص ما يكون قلبه ميت مثلي بعد كل شي مريت فيه و عشته؟ أنا بحب المرسيدس بينز – فيني أفضي غضبي وطاقتي مجرد انه سوق هالسيارة، بحس فيني اشكي همي للسيارة نوعاً ما لما سوقها وفرغ الشحنات السلبية.
الأغنية الثالثة «تريس» كلمة ليبية بتعني الزلم اللي مروا بتجارب صعبة بحياتهم بالشارع. أنا هون عم أسأل حالي «هوس» وين فيك تروح من هون و لوين فيك توصل؟ أنا مالي «هوس» إذا ما اتسما شارع بأسمي. حكيت عن شو أنا عم فكر لما أعدائي عم يفكرو فيني، بالوقت اللي أنا عم فكر كيف جيب لقمة عيشي و حط أكل على طاولتي و خطط لمستقبلي و المشاريع اللي جاي. «ضاف» فنان تونسي شاركني الأغنية وحكى عن مشاكل مشابه هو مر فيها.
الأغنية الرابعة «شارع سوريا» بمشاركة الفنان السوري «مودي العربي». حكينا عن البنت السورية و شو بتحب تشوف بالرجل السوري. و شرحنا كيف طبع السوريين بشكل عام و ليش نحنا سوريين. كيف فينا نحمي الحواري و نكون مخلصين للمكان اللي جينا منه مثال مقولة سورية استخدمها «مودي» اللي هي «معدن ذهب» و هو ركز مقطعه اكثر بالحكي عن مدينته دمشق.